یوم تشکر: افواج پاکستان کی کامیابی پر پوری قوم کا اظہارِ

---

یوم تشکر: افواج پاکستان کی کامیابی پر پوری قوم کا اظہارِ تشکر

اسلام آباد (24 نیوز) – ملک بھر میں آج یوم تشکر بھرپور قومی جوش و جذبے کے ساتھ منایا جا رہا ہے۔ اس دن کی مناسبت سے پاکستان کی افواج کو خراج تحسین پیش کیا جا رہا ہے جنہوں نے 6 اور 7 مئی کی درمیانی شب بھارتی جارحیت کا منہ توڑ جواب دے کر پاکستان کی عسکری تاریخ کا سنہرا باب رقم کیا۔

دن کا آغاز قرآن خوانی اور خصوصی دعاؤں سے

یوم تشکر کے موقع پر ملک بھر کی مساجد میں قرآن خوانی اور خصوصی دعائیں کی گئیں۔ وفاقی دارالحکومت اسلام آباد میں 31 توپوں اور تمام صوبائی دارالحکومتوں میں 21 توپوں کی سلامی سے دن کا آغاز کیا گیا۔ پاک فوج کے چاق و چوبند دستے نے نعرۂ تکبیر "اللہ اکبر" کے فلک شگاف نعرے لگا کر دشمن کو واضح پیغام دیا کہ پاکستان اپنے دفاع میں کسی قسم کی غفلت برداشت نہیں کرتا۔

وزیراعظم کی پرچم کشائی اور قوم سے خطاب

وزیراعظم شہباز شریف نے وزیراعظم ہاؤس میں پرچم کشائی کی تقریب سے خطاب کرتے ہوئے کہا کہ "بھارت نے بزدلی کا مظاہرہ کرتے ہوئے نہتے پاکستانی شہریوں پر حملہ کیا، جس کے نتیجے میں معصوم شہری شہید ہوئے۔" انہوں نے کہا کہ پاکستان ایک پرامن ملک ہے لیکن دشمن کی جارحیت کا جواب دینا ہمارا حق ہے۔ وزیراعظم نے قوم کو یقین دلایا کہ افواج پاکستان نے دشمن کو اس کی زبان میں جواب دے کر اسے سبق سکھا دیا ہے۔

ملک بھر میں تقریبات کا انعقاد

مزار قائد کراچی پر کور کمانڈر کراچی لیفٹیننٹ جنرل اویس دستگیر نے حاضری دی، پھولوں کی چادر چڑھائی اور فاتحہ خوانی کی۔ لاہور میں مزار اقبال پر گورنر پنجاب سردار سلیم حیدر نے حاضری دی اور دعا میں شرکت کی۔ وزیراعلیٰ سندھ مراد علی شاہ نے سندھ سیکرٹریٹ میں پرچم کشائی کرتے ہوئے کہا کہ "قوم سیسہ پلائی دیوار کی مانند دشمن کے سامنے کھڑی ہے۔"

گورنر خیبرپختونخوا فیصل کریم کنڈی نے پشاور میں پرچم لہرایا اور کہا کہ "بھارت ہماری خاموشی کو کمزوری سمجھ رہا تھا، مگر جواب ایسا دیا کہ پوری دنیا نے دیکھا۔"

شہداء کی یادگاروں پر پروقار تقریبات

کیپٹن محمد سرور شہید (گوجر خان)، میجر شبیر شریف (لاہور)، میجر محمد اکرم (جہلم)، کیپٹن کرنل شیر خان شہید (صوابی) کے مزارات پر پروقار تقاریب منعقد ہوئیں، جن میں پاک فوج کے جوانوں نے سلامی پیش کی اور شہداء کی قربانیوں کو یاد کیا گیا۔

آپریشن "بُنْيَانٌ مَّرْصُوْص" کی کامیابی پر آزاد کشمیر میں تقریبات

آزاد کشمیر بھر میں آپریشن بنیان مرصوص کی کامیابی پر تعلیمی اداروں میں تقریبات کا انعقاد کیا جا رہا ہے۔ اساتذہ اور طلباء نے پاک فوج کو خراج تحسین پیش کرنے کے لیے ملی نغمے، نظمیں اور تقاریر پیش کیں۔

یوم تشکر کی مرکزی تقریب پاکستان مونومنٹ میں

یوم تشکر کی مرکزی تقریب پاکستان مونومنٹ اسلام آباد میں منعقد ہو رہی ہے، جس کے مہمانِ خصوصی وزیراعظم شہباز شریف ہیں۔ چیئرمین جوائنٹ چیفس آف سٹاف کمیٹی اور مسلح افواج کے سربراہان بھی تقریب میں شریک ہیں۔

صدر اور وزیراعظم کا پاک فوج کو خراج تحسین

صدر مملکت آصف علی زرداری نے یوم تشکر پر پیغام میں کہا کہ "یہ کامیابی پوری قوم کی ہے، دشمن کی جارحیت کے خلاف پوری قوم ایک سیسہ پلائی دیوار بن گئی۔"
وزیراعظم شہباز شریف نے کہا کہ "جو طیارے بھارت کا غرور تھے، وہ راکھ بن چکے ہیں۔ شاہینوں نے دشمن پر کاری ضربیں لگا کر تاریخ رقم کی۔"